د اندونیزیا د ترانسپورت وزارت ویاندې ادیتا اراواتي وايي چې د بوینګ ۷۳۷-۵۰۰ الوتکه د شنبې په ورځ جنوري ۹ (مرغومي۲۰) له مرکز جاکارتا څخه پرواز کړی و چې شاوخوا ۵ دقېقې وروسته یې له رادار سره تماس پرې شو.
الوتکه له جاکارتا څخه د «کلېمنتان» ایالت مرکز «پونتیانک» هوايي ډګر ته پر لار ورکه شوې ده. دا ټول پرواز شاوخوا ۹۰ دقېقې دی.
چارواکي وايي په دغې الوتکې ۵۶ مسافر او شپږ تنه د الوتکې عمله سپاره دي.
د اندونیزیا د «کومپاس» تلویزون کې ښودل کیږي چې خلک د «پونتیانک» په هوايي ډګر کې خپلو دغو مساپرو ته منتظر ناست دي.
چارواکي وايي چې د ژغورنې او پلټنې د ملي ایجنسۍ او د ترانسپورت او مصؤنیت له ملي کمېټې سره په ګډه د ورکې شوې الوتکې لټون پيل شوی دی. د الوتکې له پرواز څخه یوه شپه هم تېره شوه، خو لا یې څرک نه دی لګېدلی.
اندونیزیا چې ګڼ شمیر ټاپوګان او شاوخوا ۲۶۰ میلیون نفوس لري، د زیربنا او مصونیت د ټېټ معیار او په هوايي، بحري او ځمکنیو لارو باندې یې د ګڼې ګوڼې له کبله وخت ناوخت دا ډول پېښې کیږي.
