له افغانستان په تېښتې سره مو نړۍ ته ثابته کړه چې امریکا د باور وړ ملګری نه دی. پخواني امریکايي جنرال ډیویډ پټریوس چې په امریکايي حکومت کې يې پر خورا لوړو نظامي څوکیو کار کړی دی، په تازه مقاله کې د افغانستان پر وړاندې د امریکا چلند غندلی دی.
نوموړي ویلي له افغانستان په بېړه د امریکايي عسکرو تېښتې د امریکا باور ته زیان رسولی او دا ثابته شوه چې په نړۍ کې زبرځواک نشته دی. دده په وینا د افغانستان پر وړاندې د امریکا اوسنی چلند او له دغه هېواد سره د اړیکو نه لرل د امریکا مقام او نامه ته لا ستره ضربه رسوي. هغه په دې اوږده مقاله کې د امریکایانو د وتلو او د افغانستان د راتلونکې په اړه پراخ بحث کړی دی او اوسنی وضعیت یې د سیمې او نړۍ لپاره اندېښمنونکی بللی دی.
هغه په ټوله کې ددې ملاتړی دی چې امریکا د افغانستان په څېر یو هېواد له ځان سره متحد وساتي او د افغانانو لاسنیوی وکړي. تر څنګ یې د امریکايي ځواکونو وتل او پر افغانستان بندیزونه دواړه غندلي دي.
پټریوس: افغانستان کې مو ثابته کړه چې امریکا باوري ملګری نه دی
